Nasenpfeiferl

Ois Bua hob über oiss i glacht…
Da Vadda blost ma glei an Marsch!
I hob´s  mit meim Buam grod so gmacht
Dazua an Klaps no auf´n  A…
 
An Marsch blosn – aa in da Schuj
hat mia da Lehra Tatznstock…
Und in da Lehr woar`s  andast ned.
Auf „Marsch blosn“ hob i koan Bock!
 
Und im Beruf woar`s  manchmoi schwer…
Hob gwusst, dass si des boid valiert.
A Chef blost mia koan Marsch iatz mehr,
Seit acht Joahr bin i pensioniert !
 
Mit Freindl feiern dua i gern
und mehra hob i ned im Sinn…
Mei Wei schimpft, weil i – meine Herrn –
um viere hoam erst kemma bin…
 
Ihr Gschroa heart ma durchs ganze Haus.
„Is iatzt a Ruah!“ sog i recht harsch…
I ziag mei Nosnpfeifal raus
und blos ihr an Radetzkimarsch!